A Lang Kai Vive

"Ken kaloite ei ham mah a kahoupi zing hi, kua ham iva zangkoi dia ih ham ingaina veleh"

Hatnu Phungkhothang Govt High School.

Neulai a SINGLAM leh LING kimawl chiang a akop ching val a um ngei ngei leh a koppih ding umlou pen pen a LANGKAI in kipangsak hi. Tua alangkai a pang te pen kimawl siam pen te pangsak ahi kei a, huasang in asiam senglou khat akoppih ding hung tung masang alangkai in pang hi. Akhung lam a langkai ana umlou ziakin alangkai te ading in nuam mahmah a, hoikap in hoiden kei taleh zong akik chia adeng /akaplam veve ding ahi ziak in amah adin kihoi mawl sese kul lou hi. A himhim in zong alangkai te aki hoi mawl seng ding zong ana ki phal kei a, tuaziak mah in kimawl nasung a asiam lou pen pen te alangkai in ana kipangsak zel hi. Adik tak a genkik in aloite kimawl na a mok et sang chia kipang sak maimai ahi. Panmun poimoh loupen leh neupen a poimohna um senglou luahtu alangkai ahi chilei zong izuau kei ding hi.

Leitung a um mihing leh ganhing tengin zong ham kineichiat hi. Tua ham in ihihna uh atak langh hi. Bawng leh lawi, ui leh kel leh ganhing tuam tuam te zong aham un ahihna uh ih thei thei hi. Mihingte zong iham un ihihna uh aphuangkhia hi. Genteh na ding in bawng leh ui zong asan , avom, akang leh apol um mahleh aham un ahihna uh a kok veve hi. Thangkhal te zong beh leh phung tuam chiat apat himah lei  iham un ih Thangkhal hihna a taklang veve hi. Tualeh ei ading in iham leh ibeh-iphung khoi pen tawisang zok ding poi mawh isa zo vuai leh? 

Ipu-ipa te toh iki guizop na diktak uh ih ham uh ahi a, beh leh phung pen khanggui kisutna maimai ahi chilei zong igen khial seng kei ding uhi. Van leh sil khat peuh peuh zong aki jat louhna asot chiang in sam-ek ana kai thei a, tua chiang in siagop in azatna ding umlou in amang thai thei hi. Tuamah bang in HAM zong a kizat mun a a kipuaphat zing kei leh a mangthai thei sil khat ahi kik veve hi. 

Masang lai in igam uh  India gamsung a ham 780 vel ana ki zang a hualak a 220 vel apaisa kum 50 sung in  azang ding om nonlou ziak in ana si khin ta hi. Ham pen azangtu te asih khit a asuan akhak te un apu-apa ham azil khak lou a athei khak lou chiang un ham pen azang tu ding um nawnlou in Ham Sii (extinct language or dead language) ki chi hi. 

Kum hung pai tou lai ding te a zong amang beh lai ding um hi, aziak tulai in ei sang a khantouh zaw Sapham (English) leh Kolham (Hindi) te ngaina ih um mok ua, eiham zang louh in namdang te ham innsung lak a zangh zong ih um lou tuan kei uhi. Nu leh pa te'n zong tate ih ham zilsak leh theisak masak pen ding ahi. 

Gam pa'm  Delhi, Chennai, Kolkata, USA, London dang dang lak a um khaten zong innsung a eiham chauh zatpih ding a kul leh poimoh pen a thei ding ahi. Kol ham, Sapham leh adang dang te theikei un chi'n nisial in zep lei zong akhang dungzui a athei tei tei ding uh sil khat ahita a bangmah lung himawpih ding omlou hi. Nam khat kembitna ding a poimoh pen zong ham ahi a, ham a om chiang in tawndan leh hindan zong om thei pan hi. Ih ham amang leh ih tawndan leh inam amang khinsa ahi chi thei chiat ni.

Iham uh  bang chi'n itawisang tadiai leh? A baihlam pen a gen in tulai facebook lak a imin uh XYZ Thangkhal leh XYZ melhoinu/ melhoipa (beh leh phungmin gen na) chia igelh mai mai un zong ih mi hihna uh bangtan e khat in achiangsak thei  hi. Amin ban ah Thangkhal tuangsak teleh abeh-aphung tuangsak te Thangkhal tuak himah leh uh kuapen in anam a tawisang zawei chi gen lou in ithei chiat uh hi.

Thangkhal te pen ibeh-iphung te uh nam dang lak a atallangh mah mah zong um hi. Huaziak mah adiai abeh–aphung lam a pan va la zel, Thangkhal a zong panla zel thou, alang nih nih a la zong i bei tuan kei uhi. Neulai a kimawl chiang a LANGKAI te bang in alang nih tuak a poimohna neiseng lou, omkei lei zong poilou ding khop in eimah pi kibuaisak in itai koi koi uhi. Bible in Pu nih nna nasem khom thei kei ding uhi chi, tualeh sa zong salou, vot zong vot lou alai a um gei gui zong aphal louh dan gen beh lai. 

Ahivang a EITE pi inam (THANGKHAL) leh ibeh-iphung kikal a om gei goi zing, anih tuak a ana sep som zing lai ... i sat leh sa vet, ivot leh vot vet, ibeh leh phung leh inam kikal a ih LANGKAI laisia uh khatbek hat theilou ding ahi. Langkai itopsan ua, ipuaphat ut  pen pen uh ibelh ua ipuaphat hun ahi ta.

Inam tawisang nading in imin ban ua Thangkhal gelh chiat tei tei ding chi kahi kei a, beh leh phung min gelh louh tei tei ding zong kachi tuan sam kei hi. Abeh leh phung tawisang te'n anam atawisang khaklouh dan leh aham ngainat

u ten anam angainat dan gen chiang ut zaw ka hi. Na hindan, na omdan, na khohei zia, na hamdan, innsung, vengsung, khosung leh gamsung khantouhna ding a pan nalak dan in na nam a tawisang zaw ding hi.

By:-

Neytiri Thangkhal

@Mr Khaiminthang

New Delhi

Share: