WY The Forbidden Fruit

WY kiti (world is yours) tia kihe khamnathei LOUCHANG hin igamsung u ahin hotling tan ahi leh NU le PA tamtah din lhohsat na leh lungdon khoisat na nasatah ahin lhuttan ahi. Ginchat lou leh hetmanlou kah in simlai chapang, (high school - college) upa naolhang, (jineitil) leh nupi ajitoh kikhen/meithai tamtah hiche louchang ah hin ana kibol gamtaovin ahi.

WY IPI HAM?

WY hi apipen a tahsa chohloh akimang lou chini (2)  tichu Methamphitamine leh Caffeine hatna a lou dang dang kihelkhom a kisem ahi. Hiche louchang hi KOLPAO in YA-BA (Mad/Crazy Drug) akiti in, potpo sakol ho lamtou akal dingteng ana nehsah jie u ahi. WY chang hi Heroin (No 4) kisem na mun the golden triangle kiti Laos, Cambodia leh Myanmar gamgi chin lah a kisem ahi.

Hiche Golden Triangle akon ahi Moreh hunglhung a, chu akon ajoh son ho in eiho gam a ahin thejel u ahi.

WY IN TAHSA CHUNG A NA ATOH DAN.

Hiche louchang hi aneho in aneh teng uleh 20 minutes kah in hiche louchang hin akhohet nao lampang angaina loutah in ahin suthou/chohloh in, alunggel u apilsah in, atha u ahat sah in ahi. Hiche ho jeh hin amaho in nom asa un, ahin lah hiche anopsah nao hi alou-hu ahung bei teng adai jie in, chuteng.... Luchang nat, Lohso, Lungvai, Bu-dulou, Kamsung got, Imut theilou, Ning kitel, lunghan bai tiho hi ahin nei un ahi. Hiche tahsa umdan kikhel (nopsah akon hahsat) hi thoh hahsa asah jeh un alouchang mama neh kit a nopsah nalam a kiheilut kit ding dei na jalin addict (johsah) abai lheh in ahi.

      Mihem khat chu akiham bol a addict (johsah) ahung hiteng... Bu dutalou, Mit tol, Ulchim long, Umthim theilou, Ha-geel, Luchang nat, Lungphut gang/kitup lou, Tichung chat/kisat metmut, BP sang/nem, Ti-sa, Khomu kichehlou, Lungvai, Kithing, Ki-sat, Avouso dang deh duh..... tiho anei ding achai nalam leh ..... Sam pul, Thin le Kal se, Khangmang pao/va, Lungphut tang, tiho hin ahin phah ding ahi.

      Jalhang hinkho ah jong amaho hi mi kitit nalah a alha nom pouvin, aloi agol anehkhom pi ho tohbou aki vop un chuleh aki sutheng nom pouvin ahi. Aban a neh kit ding gel najallin WY chang tilou alunggel u vah thil dang him him a um pon ahi. Hijeh chun sum aneilou teng u leh Nu le Pa sakhao guhso ahin pan un aban in guhchat lampang a specialist ahungkai pai2 jie taove. Alung u ahangbai in thil neo cha cha pou alunghan pi un akitom jie uve.

IGAM A WY KITHEJAL DAN

I gam uva WY hibang a akithejel leh atam na hi eima ho sung mama a sumtong ducha a kivei mi phabep jeh ahi. Abang khat in sum apodoh un alhai le apo le in midang agoi un abang khat in vang asum akipoh doh keu hilou in amun amun ah aga thah jie un ahi. Hiche akivei ho akon hin ajoh ho in akichoh son uva ane ho in aga kichoh jie u ahi. Aki mu bai dan chu chapang kum som apat som le ni kikah lah ho jeng in jong thahat nading leh akitetpi ho jona ding in ana ne jie uve, ama ho kiphon dungjui in. Hiche louchang hi aneo jeh in asel leh apoh abei in mikhat injong packet 1 leh 2 bailam tah a atahsa a kihe doh loubeh a apoh thei ahi.Kidang tah le tijat umtah khat chu ajoh numei ho in anumei hinao tichung ho nasan a hiche louchang apoh/asel u kihe doh chu ahi.

WY DOUDAL NA NATOH

WY doudal na natoh hi Churachandpur gamkai ah Joint Action Committee on Anti-Drug Churachandpur (JAC-ADC) leh Moreh a Moreh Youth Club (MYC) teni hi ahi. Hiche Organisation teni hin WY thah le, Joh leh Neh akham ahin, hiche natoh akon kiman WY chang leh ajoh ane atam mama tan ahin lah tuni chan hin mat ding a um jing nalai in ahi. Eimi chenna gam jouse a WY doudal na a CSO ho in pan ilah uva ituh tang diu deisah ahi. Chuleh Moreh le CCPur a jong a umsa organisation teni natoh hi itosot uva ipanhu diu dei a um e.

THU KHUMKHA NA

     Hiche khamnathei louchang WY hi tuhtang na beihel a tudinmun tabang a achal tou peh le, inamsung u ahi, phat chomkhat jou teng .... Innsung boi hung tam ding, nupa kikhen hung tamding, chaga hung pung ding, gucha hung lang ding, lekha simsang leh officer hung lhasam ding, nam lamkai ho khuni juiding mi hung umlou ding chuteng namdang te chotpha a ihung um diu ahi.

     Hijeh chun i um na chan uvah hiche WY doudal na natoh hi tosot utin pan lakhom taote. Ajoh ho in jong khonung teng akap lah a ijao thou2 diu ahi ti geldoh u tin hai taote.

  NAMPI DAMNA DIN

D Paozangam Haokip

Vice President (Orgn)

KKL Gen Hqr.

Courtesy: Social Media

Share: