Zomi Fins singer Kappi interview na

THANGKHAL sunga ding a laa siam a, ana min thang mahmah, adiak a Shillong lak ah Thangkhal te'n ana ngaih sang diak uh, sanggampa Thangliankap @ Kappi Thangkhal, atenna inn Lanva, Lamka, Manipur ah March 18, 2018 ni’n houlimpihna neih in om hi.

ZOMI FINS singer & composer Kappi Thangkhal being interviewed by
KHALVONTAWI Online correspondent MG Muanlal Thangkhal
at his residence in Lanva, Lamka, Manipur. Pic:- KV Online

Hihun ah Thangkhal zailaa Zomi Fins Vol-3 a laa nalh mahmah nih: "Thei bang sen ah, mel kithei lou Lenchiil tongsaan vang ngaih Chingbawi”, leh  “Vangkholai ah gual alawi bang i than nung in," chi laa phuaktu leh asatu Pu Kappi Thangkhal interview bawl in taang MG Muanlal Thangkhal in va kihoulimpih hi.

Kappi Thangkhal in agenna danin Zomi Fins Vol-3 kipat khiat dan, leh hun paisa a Thangkhal ading a ana pan lakdan, Pupau Kammuanpau, Chief of MT Geltam (Mulam Tanglian Geltam) leh alawite toh pan ana lak dante uh, khangsawnte thei ding in, thu tampi gen khia hi. Pu Kammuanpau lamkaina nuai ah ZOMI FINS pe’n 1985 vel in phuhkhiat in ana om hi.

Hihun ah KHALVONTAWI Social Media Admin M G Muanlal Thangkhal in va kihoulimpih hi. Kappi Thangkhal in agenna ah, Zomi Fins Vol-3 in Thangkhalte suh minthang mahmah (mite theih phak) ahihdan gen ah, amauh hunlai a, tudan a Whatsapp Facebook kichite om lou, mi toh kithuzakna zong haksa mahmah ahihdan gen hi. Lawm kingaite zong letter a kidap khak vevaw achi hi. Thangkhal zailaa pen, Kolgam Vaigam Zogam ah Zomi Fins-te ziak in mite theih phak in omta chi hi. Unau Tiddim lam te’n zong nalh ana sa mahmah ua, a laa a ngaih chiang un bang haam hihiam chih thei chian louh uhi. A laa pen kuate bawl mawng mawng ade aw, chi kan koikoi dan uh ah, miten Zomi Fins la-te angaih chiang un, Zou laa lah hideuh lou, Tiddim laa lah hideuh lou, Paite laa lah hichet lou in, kuate bawl hi hiam chi, kikan kawikawi dan inzong gen hi. Atawp tawptawp na’h Thangkhalte bawl ahi chih athei khia uhi chi hi.

Zomi Fins-te lungkia lou a ana panlakna zal un muntuam gamtuam a om khenkhat te’n zong, “Aw Thangkhal mi nam om ahi maw”, chih Zomi Fins tungtawn in ung thei pan ta uh ahihdan Pu Kappi’n gen hi.

Zomi Fins Vol-3 pen kibawllai in sum-le-pai haksa mahmah a, sum-le-pai tuak di’n a hong na mualliam santa Pu Khamsuanmang @ KS Mang Guite, nidang a M Buangmun

Hausapu va chial ua, a tenna inn tan ah va hoh un, Pu K S Mang kiang ah kam nem takin, “Pu Mang aw, Thangkhal minam min a, mite theih phak ihih theihna ding un, laa ka bawl sawm uh ah, sum-le-pa haksa ahihmanin nang ung tuak in”, chi’n va chial uhi. U Mang chi thei ding a ki lawm te'n Umang chi ua, Pu Mang chi ding a kilawm te'n Pu Mang va chi uhi. “Nang pan ung la in”, chi’n va chial vangut uh ahihdan zong gen hi. Pu K S Mang in zong Thangkhal ngainatna toh Zomi Fins Vol-3 a sum bei teng teng kiphal tak in ana tuak sak hi.

"Bang doh Aitui..” interview nei zoh hita ah, a story kigelh lel lel hi. Tu’n “Thei bang sen a, mel kitheilou” chih laa leh Zomi Fins a laa dangdang te interview zoh in omta hi. Mabanah ung kisuah khia kik ding hi.

~ M G Muanlal Thangkhal

Share: