Khampat ah ZO Pawi om di, Tuikhaal ZO Khawmpi 2015

"Tuikhaal ah ZO KHAWMPI 2015 kum in Sial 2 leh Loi 6 toh ni 3 sung kilawm"

KUM 3 dan a thupitak a Kawlgam a UZO Pawi kibawl zel zel pen tukum UZO Khawmpi a 3-veina Khampat khawpi ah thupitak in 19-21 March 2018 sung zat hi ding. Mun tuam gam tuam pan palai (delegates) tampi zong pang ding uh chi thu kiza hi.

Tuikhaal ZO women | Pic: Bruce K. Thangkhal

ZO Khua 100 val lak apan Khua (football team) 16-te huaisiah takin UZO CUP 2018 kituh ding uhi. Football pek a kuante din March 6 ni pen Zintung Ni ahita a, March 7 ni'n football kidemna pan ngal uhi.

UZO Pawi hun sung ahileh March 9-21 (Mon - Wed), Palaite (delegate) zintun ni March 19, UZO Election ni March 20, Pawipi (Main Day) ni March 21, Kikhen ni March 22.

Special Guests a uap ding a min zaak a omte ahiuleh Bishop Felix Lien Khen Thang, Pu Mang Lien Hau (UZO-USA), Rev M Kham Za Nang (USA), Prof Thang Sut Mung, Rev Thawng Khan Siing, Rev Kap Khan Khup, Rev Zam Khan Lam, Pu Chinlunthang, (President, UZO, Manipur, India) leh Pu Sesei Zou, MDC (Moreh, India).

UZO Pawi chiang phamsa ZO Holy Bible (India) translator Rev Dr Lienchinkhup Taithul (L Taithul) memorial a kibawl magazine "ZO MUOL SUONG" kichi hawnna (release) zong om ding chithu, Pu Mung Sen, Secretary, UZO, Myanmar pan kiza hi. 

Zo Cultural Dance

Pu Sergio T Haupu, Khampat Information Group Center apat thu kizak dan in, tutung Pawi ding toh kisai in USA leh foreign gam a om Khampat tualkuante zong nasahtah mai in pan theih theihna ah pang uhi chi. Adiakin Pa Joseph Khup Lam Mang (Lamkang) in bawlung (football) a ding in Sponsor bawl, Tg Cin Min Lien (Naa Nau), Pau Sien Khuol leh Germany a om Gin Hau Khup(Haup Khup or Nautum) in ZO IDOL leh FASHION a ding in Sponsor bawl uhi.

Tualeh Pa Kap Suon Mang in Muolsuong bawl na ding panpihna pia a, Pa Thang Lamh Lien (Thalien) in mipi vahna (annkuang luina) ding in Bawngkhat tuak, Khampat football Team 2 ading Uniform (puan) zong tuak lai hi.

Tutung ZO CUP first prize (winner) ahihleh Kawlsum (Kyt) 200,000 leh second prize (runners-up) Kyt 100,000 hiding hi. Tualeh ZO Idol leh ZO Fashion a first (1-na) leh second (2-na) late'n dangka 200,000 Kyt leh 150,000 sang ding uhi. Tuaban ah a pangteng (contestants) zong a gutguak in kik saklouh ding uh chi.

Zin douding khuatual lam te’n zong thanuam tak a khawmpi sim chiat din ngaina tak in Pasian min toh theisak leh chialna bawl uhi.

Pic: BKT

*Khampat ahileh Kawlgam leh India gamgi toh kinai, Moreh apat dakkal 2 vel a gamla, Indo-Myanmar Friendship Road (Moreh-Tamu-Yangon) in atawt khak, ZO khawpi kumlui leh minthang mah mah khat ahi. Nam chikim tenna khawpi khat ahi. Khampat kichi pen 'Singtang gam kipatna' china dan ahi hi. A tak tak in Khampat pen a khua aki phak chetleh lam ana 'tou' (upward) pan (pat) ngal mah hi.

U nau Mizo te'n gen thupi a aneih uh, aki neisah vawt uh 'BUANGKUNG' a chi uh, en 'Singza Buang' ichi uh tawh kibang di... om na mun ahi hi. Mizo-te khanglui tangthu ah himi Buangkung pen Kabaw Valley Phaizang (Kawlgam) ah a tun (teen) lai uah, Mizo te'n teptehna (symbol) ana suan uh ahidan gen uhi.  Hi Buang Kung pen chi tuam vilvel nakhat a nei hi. Amun zong a nuam mah mah mai a, a gei ah tuitha khat luang hiuhiau hi. Hilezong hih Buang Kung pen a baa (branch) khat tawng ta! Kua ma'n himi huangsung (compound) puapha lou, India gam bang hileh 'tourist' mun khat ding a ching tham khat ahi a, pamaai mah mah!*

The ancestral tree BUANGKUNG at Khampat

A beisa hun enthak pak ni... Tuikhaal ZO Khawmpi 2015…

- Sial 2 toh Loi 6 kigou

- TUG OF WAR (Khaukituh) = Khampat No 1 (1st Prize) & Moreh (2nd Prize)

- FOOTBALL (Bawlung) = Khampat (1st), Khuanglian (2nd), Moreh (3rd)

- ZO IDOL (Mr & Miss) = Tg Mo Suan (Tuikhaal) & Lia Mary (Khampat)

- FASHION (Mr & Miss) = Tg Hang Suan Khup & Lia Vung Khom Niang (Kale University)

- PEOPLES CHOICE (Mr & Miss) = Tg Francis Thangpi (Moreh) & Lia Saan Nu (Tuikhaal)

A sim pei te din, a nuai lam ah om lai..

Report:

Tuikhaal ah ZO KHAWMPI Sial 2 leh Loi 6 toh ni 3 sung kilawm

Mr & Miss ZO Idol 2015 | BKT

TUKUM ‘Zomi Nam Ni 2015’ Tuikhaal khua, Sagaing Division, Tamu district, Myanmar ah Feb 18-20 sung nuam tah mai in kizang hi. A 2-veina UZO (Myanmar) Khawmpi leh a 67-veina Zo Minam Ni pen Tuikhaal khua ah sial 2 leh loi 6 kigou in thupitahin kizang hi. US, Yangon, Kawlpi (Kalaymyo), Tamu, Moreh banah Zoutate khua tuomtuom panin phabeppi khat inzong pawi siim uhi.

Tuikhaal ahileh Tamu apat dahkal 2 gari (mawtaw) toh kitai hi. Tamu-Mandalay highway (lampi) in Tuikhaal khawlai tuonkha hi. Tunichieng a Tuikhaal a teng inn 600 pha hi. Zou khua dinga inn tamna leh khua minthang khat ahi hi. Tuikhaal ahileh Sialthaw khua a police officer pension Pu Lam Za Dong (Lianzaw) in 1956 kumin ana sat hi. Tuikhaal kiim-le-paam a um Muntha, Kuanglian, Yeduh, Buangkung leh Nangkateih khawte ah khaalhun chiengin ‘tui’ kang/gaw (dry) thei a, Tuikhaal khua pen tuikang ngailou ahiziehin ‘TUIKHAAL’ chi’n minvaw uhi.

Feb 18 night programme a 1-veina ZO IDOL kidemna um a, tuanah Zo lasah siamte’n Music Concert leh Zonungah melhoite Fashion Show kidemna nei uhi.

Comperes and guest | BKT

Feb 19 ni’n TUIHON PAWI kibawl hi. Bang hun hiamkhat apat in Tuikhaal in tuineh lam ah hamsatna lianpi kumsawt kuomtah ana tuo uhi. Tutung in US a Tuikhaal tuolkuon te’n sum tuokhawm in tuilam siel uhi. Tuilam pen bawlzaw sieng hita a, maban ah tui kiningching dawm ta ding a gintat ahi. Member of Parliament (Tamu District) Pu Khem Maung Suai in Chief Guest hinatoh uop a, Tuikhaal a government school pen building a bawlsah ding chi leh innsuon a solar lamp pe ding chi’n chiem hi. Mipi atul a simte’n kilungdampi in khut kibeng nainai hi. UZO (USA) treasurer Pu Lien Thawn Thang @ Thawnpi (Tuikhaal tuolkuon) leh alawmte hahpanna zalin Tuikhaal in tuineh kisam nawnlou ding dan in um hi. UZO (M) in Pu Thawnpi pahtawina (honour) leh tuhpah khusah uhi. Tuikhaal tuolkuon mawngmawng gamdang a um mi 400 val hi’n gen uhi. Khanglai (youth) numei pasal tampi foreign a pawt a tam ziehin Zogam ah khanglai tawmta mama hidan in gen uhi. Zaan programme pen nuom mama mai, lasah siem tam gintat sa’ng in.

Feb 20 ni’n Zo Minam Ni kizang a, UZO Myanmar, ZYO Myanmar lamkaite banah Pu Luncha Tungdim, General Secretary, UZO Moreh Block (Manipur) leh Zou Artistes Union (ZAU) Manipur apat – Pu KS Lyanzaw (President), Pu M. Lawrence (Adviser), Pu Paul T.K. Lal (Founder & Vice President), Pu Paulian (Member), Pu KS Thang (Member) leh Pu M. Lialian (Member) te’n zong uop ua, la ngaih tampi toh mipite awi dupdup ua, mipite’n khelah mama mai chi uhi.  Tuoleh Myanmar a Zou lasiem – Lia Kangaih Zo (Yangon), Yangon sungah lasa minthang a kigen Kachin (Kachin te’n Zo pen ka u’pa uhi chi) numei Sue Ley, Yangon a um music siem leh music studio nei lasah zong siem Sie Mang Pi banah min theilou tampi’n zong zaila awi uhi.

Kuangleng villagers

Kawlgam leh India a um Zoula sahsiemte a hing kimu chieng kingainatna a lian mama ahiding a, mabanah Zo Motion Album khat Kawlpi ah March apat shooting bawl ding uhi. Tuleltu’n recording pen Manipur a kibawl laitah ahi chi’n Sie Paul TK Lal in Zogam Today kikuppih hi. Tami Zo album music-te ahileh Zou musician nih – Sie Lalboi (Zolen Studio, Imphal) leh Sie Mang Pi (Yangon) saina nuoi a kibawl ahi ding hi. Producer Sie Thangno (Myanmar), Director Sie Paul TK Lal banah Manipur a Zou singer KS Thang leh Paulian te’n zong lakhum ding uhi. Amauteng toh Myanmar a um Zou lasiemte toh Kawlpi ah bawlkhawm ding uh chi uhi.

Zo Minam Ni lopna ah Zo nam lamkai muolliem sate suunna (tribute) nei in um a, Zo Suongpi phuhna um hi.

The author climbed upto the middle of Buangkung in Khampat

Tuikhaal tangval Mo Suan leh Khampat nungah Mary in ZO IDOL title kidemna ah guoltung tuong uhi. Fashion Show kidemna ah Lia Vung Khom Niang (Kale University) leh Tv  Hang Suan Khup te’n Miss Queen leh Mr Queen title la uhi. Mipite deina bangin Peoples’ Choice numei ah Tuikhaal ngahnu melhoi Saan Nu leh Moreh tangval feltah mai Francis Thangpi telching in um uhi.

Feb 20 ni’n Tug-of-War (khaukituh) huoisetah mai um. Khampat (No. 1) leh Tuikhaal kituh ua, Khampat (1) in guoljou hi. Kalay leh Moreh kituh ua, Moreh in jou. Final ah Khampat (1) leh Moreh hing kituh ua, Moreh in guollel hi. Prize ahileh Kawlpi a kibawl sah Taubel khaap 12 a lien ahi.

Zo Minam Ni Football tournament ah team (Khuo) 16 pang a, Feb 10 ni’a ana kipan uh ahi. Feb 19 ni’n Khampat leh Kuanglian kimawl ua, a hat tuotuo ahiman un goal a kikhum sih uhi. Tuachi’n Penalty Shoot-out ah Khampat in goal 7 thun a, Kuanglian in goal 6 thun hi. Khampat in champion la! A 3-na prize kituh ahileh Moreh leh Tamu ahi uhi. Hinanleh Tamu team pen Feb 18 ni’n kimawl di’n a hing kuon tasih ua, Moreh in guolzawna nga hi.

Zo Minam Ni lopna ah Zo nam adia nasem dia kitelkhia mi 10 ‘Zo Hero’ te zong pahtawina pieh in um uhi. Pu Lian Za Kam in “Zomi Nam Ni (Chin National Day) Ang Pianna” chi thupi pansan in houlimna nei hi. Kalaymyo a “Zo” University Students Fellowship (ZUSF)  pawl inzong laa (song) khat present bawl uhi.

ZO IDOL 1^st Prize ahileh Kawlsum (Ks.) 100,000, 2^nd Prize 70,000, 3^rd Prize 50,000. Zo Fashion Show Prize  ah numei leh pasal khat in Ks. 50,000 tuo sa’ng uhi. Peoples’ Choice numei leh pasal khat Ks. 30,000 tuo pieh in um hi.

Lamkai muonhuoi mama a kigen UZO Myanmar President Pa Gin Lian Kap (Tedim) leh General Secretary Rev. Sien Kulh Mung (Tonzang), ZYO Secretary Pa Kam Lian Mung te’n zong thugenna nei uhi. ZYO-M in Zou tate kipumkhat semna di’n kumteng in football tournament khat saita ding chi uhi. UZO Gen. Hqtrs ahileh Phaitu (Tonzang, Chin State) pansan ahi. Zo Women Organisation (ZWO) kichi Tuikhaal khuo ah um a, makaite ahileh Nu Cing Hau Nei (President), Nu No Lam Cing (Secy) leh Nu Nieng Suan Dim (Treasurer) ahi uhi.

Atawpni zaan pen va’ng a nopdan gen ding dan umlou.  Zou lasah siemte’n Tuikhaal kiim-le-paam nasahtah mai in thawn (rock) sah ua, a nuomsih chi’n koima agen umlou! Mipi nasan vaivut bang in khu vengvung mai hi. Lasahna a um chieng mipi tampi tuol (ground) leh stage tungah nawngkailou in laam dildiel uhi. Lasahte sum piatoh pahkhi awsah toh kiteh uhi. Sie Paulian (ZAU) in “Pakeng lam in lam vai…” ahing sah chu mipi mawngmawng a laam di’n hing kidiengkhie zungzung uhi. Khuolzin akihilam kiphawhkha nawnlou, ki-um sawt simta kimaitai gawp ta, melthei lawm-le-guol zong kinei panpan a kichileh kikhen hun kituo.

Agelhtupa Tuikhaal zin lai

A zingmawng nai 7am velin Tamu lam zuon in mawtaw a ei Zounupi 4, naupang 4, papi 3, leh driver-pa toh ka’ng tai panta uhi. Manipur a Zoula minthang tultheilou “Zovakhu kopbang in” satu-le-phuotu Pu Haumang pianna’ nu inn ka gaal etthaw loungal bawlthei kinei nawnlou. Tuikhaal pen Zomi hatpa chi’a anakithei Pu Thawngkhanlian (Tungdim) tenna khuo zong ahi. Tamu kitun chieng tannin ka lungsim pen Khaaltui vangkhuo ah thaam den lailai. UZO Khawmpi a 3-veina Khampat (No. 1) in 2018 zintun ding hi. Tutung Pawi ah Khampat nungah ngaihba'ng hiuhieu khat maimit ah thaamzing’e. 

~ Bruce K. Thangkhal, Joint Editor, ZOGAM TODAY

 ~0~

Share: