Bawlung suisiem Vunglawmching

Lamka, Sept 5, 2017: Miss Vunglawmching @ Lawmching ahileh National Games Village, Imphal a um Pa M Thawmzalam leh Nu Lydia te nupa gil aga Pasian gualzawlna goutan tanu 2 leh tapa 1 te lah a akhatna ahi.

Lawmching khu 13 Feb 2004 ni'a pieng, tuletu a Class IX sim lellel ahi.

Football kimawl lunglut mama a, tutan a ahina leh a maban programme a nei khen khat te tam anuai a bang in tahlang vai.

 

Ama khu District Youth Affairs & Sports te saina nuai ah 6 months course football training Khumanlampak, Imphal ah April - Sept 2016 sung vatel hi. Tua banah Febuary 20-24, 2017 in zong  Chennai (Tamil Nadu) ah Khelo India 2017 under 14 girls a State ai-oh in kuanding in selection ngah a, vakuan hi. Team bangzah te tunga goal tam tahtah in vazou uh hi.

Tua banah May 1-10, 2017 in Prime Minister Talent Hunt, Assam Rifle te saina in OORJA CAPF under 19 Football Tournament 2017 (Khumanlampak) ah Eastern Sporting Union (ESU Club) min in pangkia a, ama'n zong ama hina tahlang in goal bangzah ekhat khum kia in Runners up va la uhi.

Tualou in 22-26 July, 2017 in State Inter School Subroto Mukherjee Football Tournament under 17 girls ah Imphal East a Poireikhongjit High School min in Khumanlampak Main stadium ah district 10 apat team 10 kidemna ah tel a, final kaai uhi. Final match ah CC Hr Sec School, I/W toh kimawl ua, Lawmching inzong goal khat khum in 2-0 in zou uhi. Tam tournament a winner/champion ahi uh toh kiton in Sept 3-15, 2017 sung in Manipur State ai-oh in Delhi ah Subroto Cup International Football Tournament 2017 Junior Girl (Under 17) ah kihel lellel hi. Tutan a tam kimawl toh kisai akithei dan tam anuai a bang ahi:

Dt.3 a Manipur 8-0 IPSC at NWC stadium (tamni ni zong aman goal 1 ana khum hi) 

Dt.4 a Telangana tawh di himananleh amau hing kuanlou ua MNP in zou himai suah hi.

Dt.5 a Manipur 1-0 Madhya Pradesh at Dr. Ambedkar Stadium na gualzou kia ua.

Tua quarter final lutta in dt.7 ah Manipur vs SAI di at Dr. Ambedkar Stadium a kimaitua di uhi.

~ ZOLENGTHE

Share: