CT Lian in PA Sangma kung ah Rs 10 lakh ngen khie

New Delhi, Sept 11, 2015: Lamka sunga social worker minthang Pu Chintwahlian Guite @ CT Lian Guite, MDC, 16-New Lamka West in Manipur Tribals Forum Delhi toh kithuah in tuni’n Ex Lok Sabha speaker PA Sangma atenna inn New Delhi ah kimupi ua, CT Lian in inung lam a Manipur a flood leh landslide ziehin niteng a neh-le-dawn zawnthu innkuan tampi’n haksatna tuo uh chi kikuppi hi.

Tuanah PA Sangma in sawt apat in MP fund apat sum piak kana sawm a ahihang in, koi pen ka pie ding adiei kana thei sih hi. Manipur solkal kung ah kana pekhie ut sih hi, azieh mipi khut a sum a tunlou ding ka zaau hi chi’n meeting ah gen hi. Tami idea pen ahileh CT Lian hing puohkhiet ahi.

Tami sum pen akinlam in ka hing pie sawm ding a, Tuesday ahilouleh Wednesday tan in Cheque in CCPur ADC chairman kung ah kana pie ding a, tami sum pen mipi te khut a atunna ding nang (CT Lian) leh Manipur Tribals Forum Delhi te’n maw na paw ding uhi chi’n Sangma in gen hi.

Lamka khawpi sung a neh-le-dawn lam hi’n sepna nehzawnna tampi um theina ding ngai poimaw ahihmanin Delhi phualpi a Ministry tuom tuom zong Tribal Forum lamkai te va pha kuol ding chi’n CT Lian Guite Delhi ah taam nalai ding hi.

Tuni Sangma toh meeting ah Manipur Tribals Forum Delhi apat Romeo Hmar, Mavio,
Veilou, Timothy Chongthu leh Zogam Today joint editor Bruce K. Thangkhal te zong pang uhi.

Meeting ah Tribals Forum te’n zong Sangma toh tulel a  Lamka buaina thu zong hoitah in kikuppih uhi. Sangma in theitawp sua in Manipur tribals-te adding ana pang ding chi’n zong gen hi.

Tualeh Thursday ni’n CCpur MDC 5 – Langkhanpau Guite, chairman, ADCC, M Gouzamang, EM, Grace Zamnu, EM, Genneikhup Vaiphei, EM, Lalhrillien, MDC banah Habib Ali, Adivser, North Eastern Peoples’ Organistion (NEPO), Jiribam te’n tribal forum toh Manipur tribal te buoina thu JNU ah sawtkhuom tah kikupna nei uhi.

Tribal Forum toh MDC te hoihtah a pangtou sem a, Manipur singtang mite a di’a theitawp suo khawm ding chi uhi.

Manipur Tribals Forum Delhi in Manipur sung a um tribal organization koipou Delhi hing zin tribal problem toh kisai minister kimupi ding ahilouleh memorandum thelut ding te’n tribal forum theisah (consult) masa phawt a, pan lakhawm ding chi’n thupuon bawl uhi.

~ BRUCE K. THANGKHAL | ZOGAM TODAY 

Share: