Hmar FC in Tamchon Football Final ah SSPP zou hamham

New Delhi, Nov 30, 2014  — India khopi New Delhi a um Northeast mite’n a gen minthang ule a ngalah mama uh 8th North-East Tamchon Football Tournament final match Dr Ambedkar Stadium ah mipi asa’ng asim maiah Kiginni (Nov 30) nitah lam dah 7PM in ningkum a champion latu Hmar FC leh SSPP FC-te champion trophy ding kituh in bawngtal kisih bang mai uhi.

Chief guest a kisam Union Sports Minister Sarbananda Sonowal hing tel theisih nanleh, Omkarmal Ketia, Joint Secretary, Sports (YAS) in chief guest hina toh closing ceremony uop hi. Tuobanah  Anil Sharma, BJP-MLA, RK Puram (Delhi), Ram Muivah, IAS, Principal Secretary, Govt of Manipur, Haukhum Hauzel, IAS (retd), former Chief Secretary of Mizoram, Suakzathang Nunthuk, IRS, Commissioner of Customs & Central Excise, Noida (UP), DoNER a director tuo Dr K Guite leh Atul Basumatary, J Lhungdim, IDAS, former Planning Advisor for NEC (tulle a Principal Integrated Financial Advisor, Army Ordinance), Langkhanpau Guite, Chairman, ADC Churachandpur (Manipur), Jimmy Carter (English Premier League), former FA Cup, League Cup (1993) & European Cup Winners’ Cup (1994), leh Albert Rampal, Bundesliga Sports Agent (Germany) te’n uop uhi.

Abul apat in Siamsinpawlpi (SSPP) te’n Hmar FC-te attack pai ngal ua hinanleh deibang in goal a khum theisih uhi. Alangkhat ah Hmar FC-te jong maimai ahisih ua, amau pen thagum hat toh let a thuoh jieh un alangte din hasatna bangtan hiei umdia gintat ahi. SSPP player-te kimawl dan ki-pass dan leh kilungtuah dan un mipite a lungkim sah mama mai. SSPP fans-te (supporters) jong a honpi in Banner khai in a toukhawm ua, tualeh a gei a Hmar fans-te jong Banner lianpi ‘Takchapa Hmar FC’ kichi khai in tou ua, kikou juajua mai uhi. First-half sung SSPP in nehzaw ua, Hmar-te pe’n a jauhuoina khat ahileh goal mai ah siam deuhse a bang ua, tuachin goal attack pen SSPP goalie adia jauhuai ahi. Ahi’n SSPP goalie khu confi mama mai a, goal tampi lungsahlou in mat banah bengkhe jiahjiah hi. First-half ah goal koima’n khum lou.

Second-half hing kipat in, Hmar te’n thakhat in ang nehsim phiel uhi. SSPP te’n jong goal thumvei chiang tahin missed kha uh. Hmar te’n jong goal nihvei missed. SSPP player Paukhongam (Jersey No 12) in goal khat 77th minute in hing khum a, tuachi’n SSPP lamte dungdung dangdang sain kipahtahin kikou jengjung uhi. Tuazou sawtlou hun beina dia minute 4 chouh umlai in Hmar FC player Thomson (Jersey No 10) in goal khat hing khumlut phut a, Hmar FC supporter-te field sungah hing tailut zungzung ta mai uhi. Tuachi’n security leh volunteer te’n mipi adiehin Hmar fans-te leh SSPP fans-te touna mai ah duty puolog ta uhi. Tuakawmkal ah mi bangjat hiei khat a group in ana kihaau uh chithu zong kiza hi. Bangma serious tahtah chu um samlou! NE-mite kisuhkhawmna ah chu kihauna um jeuhjeuh himai, iplou in!

Hmar leh SSPP goal 1-1 in full-time (90 mins) bei a, tuazou in Extra Time ah hing kimawl uhi.

Theitawp suo in kimawl ua, goal khumzaw sa’ng a umsih. SSPP player khat Hmar defender-pa’n penalty huangsungah pehpua (foul) kha a, referee in penalty pia a, mipite hing pataau ta mai uhi. Ajieh hunla bei kuan hita, goal khum penpen a jou a hing um didan in ang um hi. Tuajiehin mipite pataau jaah uhi. SSPP te jong pataau! Hmar te jong pataau! SSPP player khatin penalty peh a, kineplou bangtahin Hmar-te goalpost tungah a leng vengvung a, SSPP fans-te kapdeh phialin pawna tah mai in kikou uh. A tawptanin goal kikhum ta sih uhi. Tuachi’n penalty shoot-out a hing hita.

Penalty Shoot ah Hmar FC leh SSPP FC apat mi 7 chiat in penalty peh uhi.  Hmar FC in peh masa a, goal khat khum ngal, SSPP in jong khum. A 2-na ah Hmar in khum kia, hinanleh Hmar goalie in SSPP penalty pe’n man kha chet (save), A 3-na ah, goal kikhum tuo. A 4-na ah Hmar in over a pe’h, SSPP in khum (tami a pehpa ahileh SSPP goalkeeper ahi). A 5-na leh 6-na ah khum tuotuo uhi. Atawp-na ah Hmar in khum a, hinanleh SSPP FC adi’n mangsia toh akibang tamai hi. Ajieh SSPP in penalty a pe’hleh Hmar goalkeeper in ana dangkhia (save) khia laijang hi. Tuakhu mittui luan theina kham ahing hita a, SSPP in 5-6 in Hmar FC in leelloh uhi.

Hmar FC in ningkum in jong champion la ua, tua toh a kijom a anih veina ahita, kumkia chia a la kia ule, trophy pen akitan den thei ding uhi. SSPP FC ahile tutung a sa’ng a tun pen kum uh akichi hi. Tutung SSPP FC-te play pen et nuom huai mama mai hi. Miteng in Hmar FC sa’ngin SSPP FC siamzaw chi uhi.

Tamchon Football ah First Prize ahileh Rs 5 lakh plus Trophy, Medal leh Certificate ahi a, Second Prize Rs 3 Lakh (Trophy+Medal+Certficate), Third Prize ahileh Rs 2 Lakh.  Quarter finalists – KSL (Kangleicha Sanaroi Lup) FC, Wung United, Sikkim FC, Zeliangrong FC leh Senapati FC in Rs 25000 chiet sa’ng uhi.  Quarter finalist prize pen J. Lhungdim, IDAS in hawmkhia hi.

Individual winners ah Senapati FC coach Israel in Best Coach hina la a, Top Scorer (8 Goals) ah K Lalrintluanga (SSPP FC), Best Defender Daniel Hmar (Hmar FC), Best Goalkeeper Prem Kumar (Senapati FC) leh Best Manager K.G Jaojian (Manager, Zeliangrong FC) hina la uhi. Tami prize pen Suakzathang Nunthunk, IRS in hawmkhia hi. Hmar FC player Ngurneilal Sanate in Player of the Tournament (Best Player) mu a, tami prize pen Jimmy Carter (English Premier League) in hawmkhia hi.

Champion (Hmar FC) trophy leh runners-up (SSPP) trophy pen Ram Muivah, IAS in hawm hi.

Kiginni’a Closing Ceremony masang in Third-place (2nd runners up) title kituhna ah Hornbill FC in Senapati (Nagaland) FC goal khat maimai in zou. Hornbill player Daya Elangbam in goal khat 29th minute in khum hi.

Closing Ceremony ah Red Light Passengers (Band), Roslyn Lalumpui, Maker Kashung leh Khanthing Shimray te’n zaila ngaitah toh mipite awi ua,  The Lion Dance (Sikkim) leh Bihu Dance (Assam) te munuam huai mama mai hi.

Tukum 29-30 November sungin team 16 Tamchon Trophy kituh uhi. Tangkhul Naga Society Delhi ten RN Tamchon theizingna dia North-East Tamchon Football Tournament kum teng a kibawl, 2007-kum a ana pat khiet uh ahi. Tami tournament thupi (theme) ahileh “Fairplay, Unity, Friendship and Understanding” ahi.  Tamchon kichi ahileh Ukhrul a Khadang khuo mi, IPS officer ahi a, Delhi Police ah kum 7 sung Additional Commissioner of Police ana sem ngai hi. Azi Valleygreen leh atanu-le-atapa 2006 kum-in ana mualliam san hi.

Pic: White Jersey (Hmar FC)  and Red Jersey (SSPP)

~ Bruce K. Thangkhal, Joint Editor, ZOGAM TODAY

Share: