BRIEF HISTORY OF ZOU DEFENCE VOLUNTEER (ZDV)

June 24, 1997 ni jan a Saikul khua a tuoltha na ana um khah jieh in, unau Kuki-Paite kikal ah kithei siemlou na ahing kipan a, Lamka a a tenkhawmpi uh nam tuom tuom- a dieh in Zou mipi in jong buoina ahing tuoh pan ta hi. Zou nam bitna ding leh a mipi te damna ding in UZO GHQ lamkai na in tam hun laitah in Hotel Excellency, Imphal ah kihouna ana nei ua,  Pu T. Gougin leh lamkai khenkhat ten lemna a umna ding leh Zou mipi damna ding a a lang lang a tai le le ding chi ngaitua nan le uh jong, Pu Hangkhanpau in Singneimi siem khiet a ei le ei kiven ding in, sum le pai jong aman hing ngaitua ding ahi dan ana gen hi.

UZO President Pu Thangkhanlal damlou a Delhi a aki etkol laitah ahijieh in, tam hun laitah in Pu Thangkhenkhup in UZO President hina Incharge alah na toh Zou tate Kuki-Paite kal a suohtat theina ding leh ki venbitna ding ngaitua ahing hita hi. Tualeh  October 11, 1997 ni’n Tuining Jr. High School, Tuining khuo ah UZO panlah na leh UZO Home Secretary, Pu Amchinkam vaisaina nuoi ah Zou Defence Volunteer (ZDV) phu khiet in a umta hi. Gam le nam kembit dia ZDV phu khiet a a um toh kiton in, tam a nei a te lamkai dia guon khiet ahi pai hi.

i). Pu Kamkhanpao - Commander in Chief, ZDV

 ii). Pu Khamlienkhup- Deputy Commander in Chief.

Zou Defence Volunteer (ZDV) political wing ding leh a enkol ding in Lamkai peikhawm teng in  Zou Defence Committee (ZDC) siemkhiet ahi  hi. Tam ZDC lamkai ding in mi muonhuoite ana ki guong te-

i) Chairman: Pu Amchinkam, UZO Home Secy.
ii) Secretary: Pu Nehkhojang, UZO Jt. Secy.
iii) Finance Secretary: Pu Gouzalal, President UZO Lamka Block
iii) Organiser: Pu Vumchinkhup, UZO Executive Member
iv) Supplier: Pu Khuplienpau, UZO Volunteer Commander.

Hun sawt kivei man lou in,  Zou Defence Committee (ZDC) te vaisai na in, training dia tangval kipe khie mi 80 te Khuoinuoi khuo ah October 31, 1997 ni in haahkhietna annkuong ZDC in a umpi hi. A jing ni November 1, 1997 jingmawng nai 7 in Khuoinuoi sanginn ah ZDC Secretary Pu Nehkhojang in Pu Kamkhanpao - Commander in Chief, ZDV, Pu Khamlienkhup @ Lalrum @ Elvis – Deputy Commander in Chief leh tangval training dia kipe khie teng KICHIEMNA (Oath taking) anei sah a, tuachin nam sepai teng in training na mun ding Khuongtaljou zuon in a kuon doh ta uhi.

Hun sawtpi Meitei (Prepak) te toh kithuo in Parbung/ Hmar gam a khosa in ana um ua, Operation All Clear kibawl laitah ahijieh in, hasatna ahing kipan ta hi. Government of India/Ministry of Defence te chielna bang in October 27, 2005 in Director General Military Intelligence (DGMI), New Delhi nuai ah Suspension of Operation (SoO) ana kai ta uhi.  Manipur singtangmi UG lah a ki gawm khawmna ding ngaitua ahi toh kitua in,  UG teng UPF leh KNO in ana kikhen ua, ZDV in jong mailam a hoi jaw ding khuolna in 2006 in KNO ana jop ua, tunitan in KNO a ding in a muonhuoi pen khat a thei in a um ta hi.

 

THEI DIA POIMAW

Kuki-Paite namkal buoi sung a Zou ta shi jat leh inn kihal te tam a nei a bang ahi.

1. Zou ta shina tuoh jat: 38

a) Churachandpur Sub-division a shijat- mi 11

b) Singngat  Sub-division a shijat- mi 19

c) Henglep Sub-division a shijat- mi 6

d) Thanlon Sub-division a shijat- mi 2

2. Zou Innkang DC leh SDO a kipe jat: 504

a) Churachandpur Sub-division a Innkang jat- 59

b) Singngat  Sub-division a Innkang jat - 310

c) Henglep Sub-division a Innkang jat- 94

d) Thanlon Sub-division a Innkang jat- 41

3. Zou hausatna khuo kang za- 17

4. Zou ta a Inn alou nuosie a mun chin gam chin a galtai jat- mi 5752

 

Source: Zou Ex-gratia-cum-Relief & Rehabilitation Committee

Share: