Gurgaon ah George Nangkhankhual 'Bike Accident' in mualliam

MUNIRKA a azi leh tate um private a sem, George Nangkhankhual (29) s/o Jonathan Thangkhanmang, Herbron veng, Lamka tuzingkal in Gurgaon-Haryana ah bike tuahsia in mualliam hi. A bike nung a tuong, Zenngaihlunchin (25) d/o (L) Kamthang, Zion Veng, New Lamka in alu tatliam naak sim a, Safdarjung hospital, Delhi ah operation kibawl.

Tuziing (Dec 5) baihtak in Gurgaon ah George Khual leh ani, Lunching, bike accident uh a, liam naak mahmah uh. Hiai thu gelh ahih, ziinglam dak 4:30 in Gurgaon apan Safdarjung Hospital manoh a ambulance a puak hilel uh.

Tuziing dak 2.30-3:00 kikal in Munirka a anau te un fone call dong uhi. "Tuahsia tuak" uh ahihdan Lunching in fone.

Vaite khat, ava tuak khat in, truck nuai ah ana om uh ahihdan gen. Tua vai pa'n hospital tan tun.

Omdan bel, amun ah unaupa George bei ngal hi diing a, liam-le-bai sa in Lunching in anaute houpih kiangkiang dan ahi.

George' luang Gurgaon Civil Hospital a koih in om a. Lunching in alu tat liam naak mahmah a, akawng na sa ahihman in CT scan khawng laak ngai di ahihziak in Safdarjung Hospital adia refer in om hi. Kintak in gamhuai speed in ambulance in Gurgaon apan Sardarjung hon delh pih uhi.

Huchih sung in, George' luang pen, police te'n ziinglam dak 10 nung a post-mortem bawl theih hidiing in theisak uh.

Safdarjung ah kintak in Lunching' chest leh spinal x-ray laak in om a, huchiin a lu leh a a ngawng CT scan laak in om. Kintak a operation ngai diing ahihdan doctor in gen.

Lunching in a lu leh a kawng naa sa petmah a, a u Kimboi kiang ah, "Hehpih tak in hon tusak mai ve, ka lum zou nawn mahmah kei," chi in thuum hithit. "Ka thuak peih nawnkei, inn ah pai mai ni" chi in a u zawn hi.

Ni 2, 3 paisa a Delhi hongtung pan ahi hi.

Huchih sung in, George Khual' tanu, Sarah, a inn uh Munirka ah, bangmah theisiam nailou in, kimawl sarsar in om a. Lenglate te khawng tui dawn di pia in feltak in gamtang hi. Anung sawtlou in anu, Biaklun leh a tanau te un, Gurgaon lam ah, apa meel a muh tawpna di ua va en di'n, a paipih uhi.

~ Zomi News

 

Share: