UZO Delhi Branch in Election nei, President ah K. Zou ching

K. ZOU, President UZO DB

New Delhi, Aug 14: August 13, 2013 nitahlam nai 7:30 in Mizoram House, Visant Vihar ah United Zou Organisation (UZO), Delhi Branch 2013-2017 sung a vaipaw ding lamkai telna um.  Tami hun ah Delhi mun a um innsuan apa teng, government service neiteng ban ah meithai innbul det neiteng in vote khietna nei uhi. 

UZO Delhi Branch ah vote nei mi 106 lah a mi 84 in vote khie uhi. President post ah Dr Philip Thanglienmang in vote 39 mu tuoleh Khamchinpau @ K. Zou @ Paunou in vote 45 mu a, K. Zou president di’n telching in um hi. Vice-President post ah Khakhai Zou in vote 48 mu a, Thongkhanthang in vote 34 mu hi. General Secretary post ah Kamlianlal Zou uncontest in ching. Joint Secretary ah T. Khamkhanchin @ Chinpu in vote 43 mu a, Chinliansiam in vote 39 mu. Secretary Organisation ah T. Zamminlun in vote 31 mu a, T. Ginmuanlal in vote 41 mu hi. Secy Info & Publicity ah Zamkhanthang Mate uncontest in ching a, Finance-cum-Treasurer ah Thongzakhai Zou in vote 38 mu a, T. Ginsuanlal in vote 43 mu. 

Tami election toh kisai a hing kalsuon Manglianthang President UZO GHQ, Vumchinkhup Vice President UZO GHQ, Jamngam Chief of Khuongkhaijang leh Ginsuanhau MLA Singngat te saina nuoi ah election lawching tah mai in neih in um hi. Tuaban ah tami hun hing uop Delhi a um Zou pastor teng jong kim diam uhi. 

Vote kikhiet zaw in Polling Officer a hing kalsuonte ban ah Pastor teng leh ZYO D/B President leh ZSP D/B President te’n vote simna nei khawm uhi.  Result puonkhiet ahinua in UZO GHQ Vice President Vumchinkhup khutnuoi ah kichiamna (oath-taking) neisah in um. Tuajaw in Rev. Dr. Langkhanthang Lianzaw in a telching a umte thumsahna nei hi. Result kisim kal in mipi te’n nitah ann kineh pan hi. GS Haupu lemgel siamna toh mipi te’n nitah ann gilva tah in amun a kine hi. 

UZO Block Election Programme 2013 kimu dan in 22/08/2013 chieng Behiang Block (Amun: Behiang), Haopi Block (Amun: Lunmual), Lamka Block (Zogal Hall), Tuining Block (Tuining), Gunpang Block (Khaukual), Kailamnuoi Block (Aina), Kana Block (Salem) leh Moreh Block (Moreh) ten Block Election nei ding uhi. Tualeh 23/08/2013 chieng Singngat Block (Amun: Singngat), Zotang Block (Muallum), Lentang Block (Daijang), Sugnu Block (Sugnu), Tuila Block (Sabuol) leh Imphal Block (Imphal) te’n Block Election nei ding uhi.

Gurgaon Lamte

In brief: UZO DELHI ELECTION RESULTS

President: Khamchinpau @ K. Zou @ Paunou 

Vice-President: Khakhai Zou 

General Secretary: Kamlianlal Zou 

Joint Secretary: T. Khamkhanchin @ Chinpu 

Secretary Organisation: T. Ginmuanlal 

Secy Info & Publicity: Zamkhanthang Mate 

Finance-cum-Treasurer:T. Ginsuanlal

~ Joint Editor, Zogam Today

Share: