Delhi a NE mi 3 vawtu pa-ta mat in um, adang mat hilou

New Delhi, May 7, 2013: Thawtanni a Northeast pasal mi thum Munirka a vawtu pa-ta, Adarsh Kumar leh Ashish Tokas, Delhi Police in tunin man. Apeisa Thawtanni nitah dah 3.30 vel in eimi tangval Roney (25) leh Guite (23) a umna inn kot gei a din lai un inneite pa-ta leh kawlte kithuo in ana vuo uhi. Roney in agenna a akamsung ah thousi khat lut ziehin achil leitual a sekhia a, tuami inneipa Adarsh Kumar in mumu bangma genselou in thakhat thu ana hawn vuo uhi.

 

Roney leh Guite vuo a um thawmging, Samson in aza phetin va del a, tuanah kawlte mi 10 vel in singtoh siatoh satchitah a ana satlai uh va phel sawm a, hinanleh amapa zong vuo thuolaw hi.  Roney khu a lu kisat keh sah a, Guite ahileh a veilam bil liam a, operation ngai phial ding dinmun ah um. Samson, mi pheltu apang zong, a awm leh a khut ziatlam lah ah liemna tuo.  

 

Tami thu Timothy Chongthu, Finance Secretary, KSO Delhi in aza phet in ana del a, Delhi Police phone bawl ngail hin gen. Tuachi’n eimi tangval thum teng medical test bawl din Safdarjung hospital puahtung hi uh chi’n Zogam Today hil hi. Tambang a NE mite vuo-le-sat thuoh tukum adia a guh veina ahita chin NE Helpline in gen. “Ka inneipa un Police-te kung a bangma na gen lou ding uh, na gen uleh na tunga bawlthei tantan in hing kibawl ding hi chi’n ang gii uhi,” chi’n Roney in gen.

 

Tami thubuai toh kisai in Vasant Vihar Police Station ah FIR gellut in um. FIR gellut a um thei nadin NE mite tawmngai khenkhat adiehin Bruce K. Thangkhal, Media Incharge of NE Helpline, Satminlun Khongsai, General Secretary of Kuki Students’ Organisation (KSO) Delhi, Huten Alexandar, General Secretary of Naga Students’ Union (NSU) Delhi, David Sukte, Vice President of Zomi Student’s Federation (ZSF) Delhi Cell, Thanglenpao, Asst Information Secretary/KSOD, and Timothy Chongthu, Finance Secretary/KSOD te’n nitah dah 4pm vel apat police station a buaipi ua, zankim dah 12 vel, Anil Sharma, Station House Officer, Vasant Vihar Police Station ang tung in FIR gellut in um pan chin gen uhi. 

 

“Roney leh aloi ten a buoithu uh ang call ua, ken zong kava del pai a, ka tunle sisan ana kaai zengzung ua, Police-te ka call ngal hi. Hinanleh police ten buoina mun hing phalou in, lampi ah kang nga uhi, nabawn hing pei un achi zieu uhi,” chi’n Timothy Chongthu in gen. Roney, call centre a sem lellel ahi a, amapa khu a lu (head) kisatna keh a, tualeh a loipa Guite tulle a IT course zil a um khu a bilngeh (eardrum) keh dan in thu kiza hi. Doctor ten na bilngeh keh ahi, minor operation na kibawl ngai ding ang chi uhi chi’n Guite in zong gen. Samson ahileh a awm leh aban ziatlam lah a liem na tuo hi.

 

Tahbang kal a, Safdarjung hospital medical report in NE mi thumte liem dan bangma kichien tah in tahlang lou hin thutut kimu.  Police ten tuletu a medical report a detail kinga ahi a, tua dungzui in case belap tou ding ahi chi’n gen.  Roney sanggamnu, Stacy in, “Zani zan ka room ua ka gieh ngam nawn sih ua, kaloite inn khat ah ka gieh ta uhi. Maban ah hing tup kha ding uh ka zau mama hi,” chi’n a zaau dan thu gen hi.

 

Tambang NE mite tung ah hasatna siltung khu a khatveina ahisih a, tampi gendoh in ana umkha sih hi.  Inua ha beisa April 28 (Pasianni) nin eimi pasal khat mah Munirka a lampi ah vuo ana thuo kha hi. Tua pa’n agenna ah lampi a ka peina ah bike khat in lampi ana block a, themkhat lamning lam a hei deu dia ka ngetleh ahawn in ang bawm uhi chi’n gen. NE mite kivuohna tungah Northeast Student leader ten mivawte lah apangteng a kinthei pen a man ding in Delhi Police ah ngetna bawl uh. Tambang mite mat ahilouleh maban ah a silbawl uh tawpsan ngailou ding uhi chi’n police kungah ngetna nei uhi.

~ Bruce K. Thangkhal, ZOGAM TODAY

Share: