2013 New Year greetings from Admin

KUMTHAK CHIBAI !        

                Tutan hungpui ibiak Toupa Pasian min iphat a, Ama tung ah kipakthu gen in thupina teng teng ikhusak hi.  Kum 2012 pen siatna hoihna tuam tuam toh a pailiam ta a, khenkhat a ding in vangphatna kum ahikha ding a, akhente ading in dahna kum jong hikha ding hi, bangteng hileh abeisa ahita a bawltheih bangmah inei nonkei a, kumthak ahitawh kituak in ilungsim te thak sak in hunpaisa te manghilh in lunggel thak in ikipan thak ding uhi. 

Kumthak 2013 sung ah Khalvontawi te in isimlai, isepna lam chiat ah athak in panla in, kumlui sang a chitakjaw leh kuhkaljaw in panla ni chih ikideihsak uhi. Kumlui a ilungkimlouhna tuam tuam te, ilawhsapnate athak a ngaihsut in panla thak ni hang.  Lawhsapna ichih pen lawhchinna ding a kalbi khat ahi a, lawhsapna omlou in lawhchinna jong omtheilou jel hi. I lawhsapnate pen enthak in lawhchinna ding in siampha thei ding hihang. I lawhsapna te enthak a pan ilak thak chiang in lawhchinna pen ikotbiang ah hung dak ta ding hi. Lawhsap nate jiak in lungke kei ni, lawhchinna kalbi in jatsawm jaw ni. Tua hileh khantouhvai hijaw ding a eima mimal, innsung leh inam  ading in phattuamna leh khantouhna tuntu ihijaw ding uhi.

I hawmthawh tak uh Khalvontawi blog jong mite neih bang in thupi sakei mah lehang, aneu tuan kei hi. December 2012 in site piching in domain ki register ta a, tuaban ah sanggampa Bruce K. Thangkhal panlakna tawh niteng in thusuak tuam tuam ki update jiah jiah ta hi. Viewership jong domain piching ahih apat in pung tou jel ta hi. Hun hung paijel ding ah viewership tam ta ding ahihman in hosting jong atuam lak ngai ta ding a muh in om hi. Hinanleh, KV te’n eima neihsa ngaisang lou leh puah sawm lou a I om lai siah in khantouhna piching taktak om thei lou ding hi. KV sung a thute ah ingahdan te kum jel in, adiak in ‘KV Innsung kukupna’ ah ideihdan, ngaihdan te genkhejel lehang muntuam gamtuam a om ihihhang in ipankhawmna itaklang ding uhi. I ngaihdan te inam lamkaite kiang ah tunglou ding, kuamah in thulak lou ding chih nading bangmah a om kei hi, thuhoih-lahoih igen leh site Admin te’n nam lamkaite kiang tan jong tut touh kisawm gige ahi.

Tuaban ah, I deihthawh tak uh Thangkhal Bible (New Testament) jong ut hun hun leh utna mun peuh a ettheih/simtheih ding in net sung a kumkhat paita in kikoih tahi. Hih online a koih na ding a panla teng tung ah athak in kipakthu igen uhi. Simtheih chauh hilou in download theih in jong kikoih hi. Hih bang pen unau Paite leh Teddim te chihlouh eimi sung ah anei  omnai lou a theih ahi. Inam neu mah leh ipankhawm nate jiak uh hibang tan tung ihihlam manghilh kei ni, hih bang a phattuamna ineihte jangkhalou leh jatsawmlou a I om leh khantouhna daltu ihikha ding uhi. 

Kumthak in nang leh na innsung mite Lemna, Muanna, Damna, Hauhna, Lawhchinna leh ki itna hung tut ta hen.

KV damsawt hen !

Admin.

Share: