Tamchon Football Final Dec 1: Hmar Vs Zeliangrong

DELHI a NE mite dia football tournament ngalah huoi mama khat a kigen, a 6-veina NE Tamchon Football Trophy umna Dr Ambedkar Stadium ah Nov 29 ni’n HSA FC (Hmar) in ning kum a champion Kangleicha Sanaroi Lup (KSL) khu penalty ah zou a, Zeliangrong FC in TSFD FC (Tripura) 1-0 in zou a, amau gel final ah kisuh tuo ding in um ta. Dec 1 chieng Ambedkar ah aw chi ahita!

 

Semi final match 1-na khu HSA FC vs KSL ahi. Kimawl minit 6 chetin HAS in penalty khat mu a, goal khat ang khum ngal uhi. Hinanleh KSL in zong khat ang khum pai hi. Half tan in goal 2 tuo kikhum uhi. Half zou in khat tuo kikhum ua, tuachin extra time 30 mins kimawl ua, goal bangma lut nawnlou. Penalty ah Hmar goalie in khat ang save a, tuachi’n KSL in HAS 8-6 in lel uhi.

 

Semi final match 2-na Zeliangrong FC vs TSFD FC (Tripura). Zeliangrong FC in half tan in goal khat chouh khum a, Tripura in bangma. Hun beitan in Zelingrong in goal khat in zou suo hi.

 

HSA FC-te Final 3-vei lutna ahita a, Zeliangrong FC toh 2008 ki final ua, DMZP FC toh 2010 in ki final uhi. Zeliangrong FC in 2008 Champion la a, 2011 in Runners-up in pang hi.

 

North East Tamchon Football Trophy final match khu Dec 1 nitah 5.30pm chieng Dr Ambedkar Stadium ah HAS FC leh Zeliangrong FC ‘champion’ kitu ding uhi.

 

NE Tamchon Trophy ahileh Ministry of Youth Affairs & Sports leh Ministry of DoNER in a sponsored ahi banah ONGC, Oil India Limited leh COSCO te’n zong co-sponsor uhi.

 

First Prize (Champion Team) la te’n Rs 5 lakh, Medal leh Certificate sa’ng ding ua, 3-vei kizawm a la te’n trophy kitan ding uhi. Tutan in koi man la zou nailou. Second Prize Rs 3 lakh + Medal+ Certificate leh Third Prize Rs 2 lakh+Medal+Certificate ahi.

 

Quarter Final lut team 5 kungah Rs 25K chiet mu ding tualeh Best Striker, Best Mid-Field, Best Defender, Best Coach leh Man of the Tournament te’n Rs 5K chiet mu ding uhi. Best Team of the Tournament (Fair Play Award) in Rs 20K mu uhi chi’n organiser te’n gen uhi.

 

Closing Ceremony ni’n Final Match um ding a, tuonah External affairs minister Salman Khurshid leh Election commissioner HS Brahma te’n Chief Guest leh Guest of Honour hina toh uop ding uhi. NE MP, Delhi Commissioner of Police Neeraj Kumar leh President of Delhi Soccer Association Subhash Chopra, MLA te’n uop di’n kigen. Shillong Chamber Choir banah NE lasa siem tuomtuom te’n zong zaila awi ding uhi.

 

Tami tournament khu phamsa RN Tamchon (ACP, Delhi Police) theizingna Tangkhul Naga Society Delhi (TNSD) in 2007 a ana pat ahi. NE mite lah ah ‘games leh sports’ tungtawn a kilemna, kituohna leh kitauna um thei ding chi tup thupi pen khat ahi chi’n organiser te’n gen uhi.

~ Bruce K. Thangkhal, Joint Editor, ZOGAM TODAY 

Share: