10+2 JAWH CHIANG BANG ??????

(Class 12 exam dingte leh nu leh pa te sim ding a deihsakna thu)

THUPATNA:

Tukum 10+2 exam nai mahmah ta ahihman in 10+2 ban ah bang? Chih thulu jang in theih dandan saulou kikum ni. Inn lam ah 10+2 sang in Class X pen ithupi bawljaw sim mok un kathei hi, thupi bawl louh ding chihna ahituan kei a, hilehjong Class X sang in 10+2 pen thupijaw in ilaisimna lam leh ihinkhua a maban ding saikakna hun poimoh mahmah ahijaw hi. 10+2 apat in maban banglam napai diai chih pen thupukna nalak hun ahita hi. Khatvei thupukna nalak khit chiang in nalak fuh leh na maban apai hoih mai ding a, nalak khelh leh gualnung phalou ding nahi mai hi. 10+2 jawh a career khekkik chihpen thil buaihuai pi ahita hi. Hih apat ihinkhua a ipaina ding lampi penpen juih den in lohchinna leh miphakna hung tut thei hi. 10+2 kajawh a Manipur University nuai a BA kana bawl jiak in ka classmate muntuam a maban ana simjom te nung pen kumkhat vel mah in kaphajou kei a, tutan aphalou kahi ta mai hi. Tuhun chiang in Manipur University bang achita diai chih vang katheikha nonkei. Ahinlah neilou sasa a Manipur pulam tup ding kachihna jong ahituam kei hi. Tuajiak in 10+2 jawh a maban thupukna pen nguntak a ngaihtuah ding poimoh hi. Decision na lak fuh leh maban paijang leh lohching, na lak fuh kei leh gualnung phalou chihna himai.

NGAIHSUT MASAK DING THU:

I gensa bang in 10+2 ban pen icareer a deciding factor ahihbang in maban ah course tuamtuam ziltheih/sintheih tampi om a, tuate lak apat ideihpen, lunglutna pen leh ijawh ding pen khat telkhiak ding chihna ahi a, pilvangtak a decision lak hun ahi. Maban ding decision lak ma in thutamlou naihtuah masak ding hoih hi –

1. Na course lak ut pen na lunglut in na thajawh taktak nai? A maban ding bangtan namu thei a.

2. Tua course bawl in jou talechin sepna lam leh amaban alimchi nai? Baihlam tak in Sepna namu na diai?

3. Course dang te sang ahoihjawk na bang om ahia? Bang ding a course dangteng sang a na lunglut jaw ahia, chih pen kidong thak thak in.

4. Tua course na lak sawm pen nangma mimal ading in na career lam ah khantouhna ahi na diai?

5. Na course lunglut pen na innsung sum dinmun in a jou na diai? A haksat ding leh nang leh nang ki sponsor dan lampi a om thei diai, scholarship, bank loan chihte a om thei diai?

MABAN SUTJOP NA LUNGLUT LEH…

Tuhun chiang in ei leh ei ki sponsor ding dan jong lampi tuam tuam omta hi. Etsakna in IIT chihvel bang ilut jawh leh bank loan baihlam tak a lak a, innkuan te subuai lou a kitoudelh theih ahi. Tua bank loan pen course ijawh chiang a ditkik ding chih dan ahi. Ban ah, University tuam tuam, course tuam tuam ah stipend/scholarship muh theihna jong om veve hi. Etsakna in Indian Statistical Institute, Kolkata ah B.Stats(Bachelor of Statistics) bawl te ading in stipend 3000 kha teng a muhtheih om hi. Hih course pen Cl.XII Math leh English subject a pass ten bawl thei hi. Ahihkei leh JNU(Jawaharlal Nehru University), Delhi ah Language Course bawl lehang jong stipend tamlou om veve hi. Hihte pen itheihphak tamlou igen ahi a, adang jong tampi a om ding a, tuate pen kanhat jonhat a theih ding ahi. Ahihthei leh mi mun tuam tuam a omte dot ding kisuanglah kenla donghat kanhat lechin thu nathei mai ding hi.

Khat veivei Course lak jong milak louh louh lak ding chihbang ngaihdan om jel hi. Ajiak pen milak loute ilak chiang in sepna lam ah chance tam kineijaw jel hi. Ahinlah milak louh chih hang a, bang chibang ahih jong theilou, maban bang ahih jong theilou a valak ding chihna ahituan kei hi. Apoimoh pen chu icourse bawl amaban ding chian tak a muh ding kisam hi. Ei pawl in mitam na lam lam i delh ua, adiak in numei te bang XII a jawh uleh nurse chih aki gelhsa bangsim in inei ta ua, hihpen chindan hoihlou mahmah ahi. Nurse pen ahoih kei chihna hilou in milak jiak a valak ding, itate jilsak ding ahi kei a, amau apat lunglutna et ding ahijaw hi. Law (5 yrs integrated Law course), Pharmacy Science, Agriculture, Floriculture chihte bang bawl asiatna omlou te leh eimi tamnailouh louh nate ahi.

NASEPNA NA LUNGLUT MAW? INNSUNG HAKSA….!

10+2 jawh chiang in maban sim ilunglut kholkei leh sepna jong muhtheih ding hunkhop omta hi. Innsung haksa apat ihihleh maban sim sang in sepna lam ngaipoimoh in kisingsa pai lei nu-leh-pa ikithuah pih theihna hoih pen ahi ding hi. Sepna muhtheih tamlou te –

1. NDA ( National Defence Academy): 10+2 a PCM lak ngai. Kumteng in UPSC in exam a conduct jel a, Written, Physical leh Interview a om. Army, Navy leh Air Force lam a ding ahi. Lohching suak toute Officer lianpi ahi ua, a career uh jong saupi tung in ahoih mahmah hi. Thuchian www.upsc.gov.in ah en in.

2. SSC(Staff Selection Commission): Kum teng in SSC in exam stage nih in anei jel- Prelims leh Mains. Central govt. office te a Data Entry, Multi Tasking, Clerk leh adangdang ading in exam om gige hi. Post khenkhat Graduate post a tetawh pay kibang jong om mok hi. Thuchian www.ssc.nic.in ah en jel jel in.

3. Banking: Tuhun chiang in banking lam ahihleh common written exam IBPS in a conduct ta a, khatvei fuh deuh a isim leh mun tampi a settheih ahi ta hi. Hih exam a score pen bank tuam tuam IBPS nuai a omte ah post awng a om chiang in kijang thei hi. Cl.XII apat in Bank Clerk apply bawl theih hi. Bank Clerk pen aneu nachi maithei, probation jawh in amau sung a exam te a pass touh jel jel uleh sawtlou in kaisang thei ngal uhi.

Sepna khat phot pen neu in lian leh lunglut tak a isep leh maban a kaisang theih jel ahi. Hih atung a te leh atuam tuam sepna awng te pan tulai in online apat apply ding chih ahita a, computer knowledge tamlou neih poimoh ta ahihman in basic tan bek theih na ding in sinlai ten pan la lehang ikideihsak hi.

NASEM LEH LAISIM:

10+2 jawh a nasep pen laisim lunglut leh tupguhna nei mi ading in laisim lam a THE END ding chihna hilou hi. University tuam tuam ah Corresspondence (agal a laisim) course tampi om hi. Tuate ah admission lak a haksa loutak a Graduation jong jawh theih dan ahi. Thamlou in na lawhsa sum neita ding nahihman in laibu/magazine na deih bang bang na leijou ta ding a, nidang lai sang na theihna a lianjaw ta ding hi. Tuachin Graduation na jawh chiang in post sangjaw lam na gelh theih ta ding hi.

 

THUKHITNA:

Muhdan deihdan theihdan saulou igen ta a, igen teng pen 10+2 a pass te maimai bawl theih ding ahihman in sinlai 10+2 a exam tou ding te’n chihtak na toh lunglut tak a lai sim in lohching ding a panla chiat ding in iki ngen hi. Tuhun pen “survival of the fittest (and fastest)” ahih tak man in lawhchin maimai jong deihkhop huai ahi nonkei a, sangtak a lawhchin tup ding ahita hi. Tupna sang sak in tungjou ding in panla phot lehang imanna ding bang om ahia, ijoh kei tak lelah aniamjaw lak dan siam lehang himai maw. Muhdan theihdan deihdan akibang kim khol kei ding a, kei muhdan deihdan theihdan te adik pen hi chihna bangmah a om tuan kei hi. aSangjaw, Siamjaw leh Hatzaw ding in Toupa’n simtu teng hung gualjawl chiat ta hen. 

[ maban toh kisai a dot ut theihsiam louh na neih leh bangchik lai pouh in khalpipa@yahoo.com ah dot theih ahi]

Share: