Delhi leh Lamka khopi ah Zou Gal Day thupitah in kizang

Lamka | Delhi, March 17, 2011: Kum 1917-1919 lai vel a Mangkang (British) te’n Zougam dung leh vai a pawt puoh (labour corp) ding toh kisai thagum a Zou suonte a’ng nawl uh lungawi in Zou ta kuol ah salpha tampite’n ana doudal uhi. Tam ni thei zingna ding in tuni March 17 in Lamka khopi leh Delhi khopi ah Zou Gal (1917-1919) Day zah in um. Lamka ah ahileh Zogal Memorial Complex ah sun hun leh jan hun zah in um a, Delhi ah ahileh MP’s Club, South Avenue ah seminar toh kithuo a za in um hi. Lamka mun ah ahileh mipi tam dan Zogam Thusuo editor, Pu Nengkhanlun in agen dan in Zou khangthu a di’a mipi tamna vaiguon khat a chiemte thei hi’n gen hi.

Delhi khopi ah ahileh Zou Sangnaupang Pawlpi saina toh zah in um a, tuonah Dr. David Vumlallian in chiengkuong thei tawp in Zou Gal hing kipat dan, ang kipat na zieh, gaal asaat dan uleh a bei dan tanpha gen siitsiet a, naikal 2.30 vel a gen sungin mipi kiu aw, kau aw chi koima umlou in kamka pempam kawm in ki ngai chiet hi. A thugen a zaw in thu dohna leh dawnna um a, mipite tai mama hi. ZYO President Pu Khakhai Zou in Zou salpha, a nam leh gam adia hinna ana pete jataatna lienpen toh minute khat sip dide a suunna hun ah lamkai in thumna toh hunpatna nei hi. UZO Delhi Branch President Pu Philip Thanglienmang in zong Zou gal tungthu tomkim a genna nei hi. Lasah siem nungah tangval ten akal lah a mipi tawhhalna’n la sa jel ua, atawpna ah MELC D Chairman Pu T. Zamlunmang Zou in thumna toh hun khahna nei hi.

Lamka khopi ah ahileh jinglam nai 11 in vaiguon kipan hi. Sun hun leh jan hun a khen in um. Sun hun in Zomi Council Chairman Pu LB Sona ahileh Chief Guest in pang a, Guest of Honour in President MPC, President Hmar Inpui, President Meitei Society CCPur te pang uhi. Tualeh Functional President in Pu Tongzathang leh President Kuki Inpi, CCpur pang ua, Chief host in Pu Ginsuanhau, Prez UZO pang hi. Zin-gunte thu gen a nep anawi pen ngah ahi nalai hi.

Jan hun ah ahileh vaiguon nai 6 in kipan kia a, tuanah Chief Guest in Pu Langkhanpau Guite, Chairman ADC CCpur panga, Guests of Honour in Pu Demmang Haokip Vice Chairman ADC CCPur, Pu G. Suanchinpauo, Member ADC CCpur, Pu Tongkai Baite, Member ADC CCpur te pang uhi. Tuaban ah Functional President in Pu P. Sianzadong, Chairman Finance Committee, ADC CCPur pang a, Host in Pi Grace Zamnu, Member ADC CCpur pang hi. Tam teng ban ah Official Invitees Pi Jacintha Lazarus, DC CCpur, Pu Brig. Surender Neta, Commander 27 Sect ARs, Pu GB Sharma IPS, SP CCpur te zong vaiguon ah tel kim sipsep uhi. Special Invitee: Presidents & Gen. Secretaries of ZYA, KKL, HYA and YMA te zong ngaina tah in hing tel chiet uhi. Jan hun ahileh mipi tam seng in Zoveng sung teng ahileh au chitah in au veng vung chi uhi.

Jan hun a Chief Guest Pu Langkhanpau Guite in a thu genna ah Village Council Act toh kisai ama ngei ngei in Manipur Chief Minister kunga implement hi da hen chi’a na ngen ahidan gen a, tam toh kisai mipi’n ADCte a thuop uh poimaw hin gen hi. Ama’n agenbe jelna ah Zomi te ahileh hausa a ki vaihawm ahoipen hi ding ahi chi’n zong gen hi. Hausa galkap lamkaite zieh a tu i dinmun, hamphatna neuh neuh umte tang ihi dan uzong gen hi. A thugenna mipi bil sunga lut lien pen ahileh Zogal Day pen state level festival khat ahi poimaw asah dan leh manipur govt kunga phut hi ding ahi dan zong gen hi. Jan hun ahileh nai 11 vel in bei man liing lieng hi.

~  Zogam Today

Share: