TAPIDAW KUM 100 CHINNA LEH I MABAN

                                                                              - Mangneu Thangkhal                                      

                       Tukum 2010 ei Lamka biala Pasian thu hung lut kum 100 chinna ahih ziakin Gospel Centenary thawmnging mun tengah zak in aom hi. ICI-te’n February 4-6 in alawm khin ua saptuam khenkhat in zong a lawm tou zel lai uhi. Saptuam tuamtuam kipawlkhawm in May 4-7, 2010 in Lamka Pulic Ground leh Delhi ah May 7-8 in kilawm ding hi. Welsh Presbyterian Missionary Dr. Watkin Roberts, pu Lungpau leh  pu Thangkai-te Aizawl panin February 5, 1910 in Senvon khua ah hung tung uhi. Senvon Hausapu Kamkholun ngetna banga school hong dingin W. Roberts in Savawma, Vanzika leh Thangchhingpuia te ahung sawla May 7, 1910 ni-in Senvon tung uhi.

                       

            Christianity kumzabi 1 laia Jerusalem pana Asia leh Europe gamte a thehthanga ana om apat tunitan gam tamtak ah Christiante bawlsiatna a om tou den hi. Emperor Constantine The Great, 312 AD a Christian asuak khitin Rome gam pumpi a sahkhua zuih lian pen asuak hi. Europe gamte ah ana kithehthang hi. Kum 999 tanin atamzawte’n Christian sahkhua azui uhi. Kum 1800-1900 kikal sungin tumlam gamte’n gamteng ah missionry sawlkhia ua, gingtu azahnih in kibehlap hi. India ah hun sawtpi tumlam misssionary-te’n tangthupha thehlutna di’n pan ana la tou mahleh uh ana machal kei uhi. Atawpna pen leh a hut(phase) 4na in India 1876 a British kumpi khutnuaia koih ahihnungin Bengal, UP, Punjab lak ana luh zing hang un deihbangin alohching kei uhi.

            Eite’n doudalna huaisia omlou a baihlamtak a tangthupha i na ngah uh pen manpha mahmah hi. Christian i hih nungin lamchitenga masawnna i ngah uh chih nialgual louh ahi. Tangthupha ana mu masate leitung taksa dan ah zong changkang masa uhi. Thangkhal biala Pasian thu ana lut zekai deuh ziakin i tenpih namdangte nusiat in i om uhi. Lushai missionary-te ana lohsap nung un “Thangkhal Kual” a ECC(EBCC) missionary Pu Thawngluan T. Khazang khua ah March 7, 1939 in ana tung hi. Ama nasepna tungtawnin i nam pumpi Tapidaw(Christain) i na suak uhi. I nam pumpia a khatvei Christian i na suak khak pen hamphat huai mahmah khat ahi. Tutan tangthupha zakhalou Asia leh Africa gambup ah pumdim lai hi. Manipur a i singtangmipih mahmah Naga-te lak ah zong tutan Christian suak nailou hun khop om lai uhi. Kum 100 Christian i hih nungin i khotang leh saptuam dinmun ah khantouhna lianpi atung hi chih i mu hi. Ahi’n alehlam i etleh Christian dinmun ngiamkiatna thupitak zong atung kik zel hi. Lamka khopi ah tualthahna,numei-pasal kala thangtatna, nekgukna, khamtheih bawl chihte uang mahmah hi. AIDS leh drug addicts lamah India chauh hilou leitung pumpi a zong chiamteh phak ahi. Guktatna lamah car a taikawma uipi gumang, mipi kikhop laitaka generator thautui va khaihkangsak, zankala  biakinn sunga inverter gu chihte vel  ahi. Tua dana i paitouh leh maban ah Nagaland, Mizoram, Meghalaya leh (outer) Manipur “Christian gam” hi den di dan a i na koih pen kum 100 nung in “Christian ngiamkiatna gam” suak ding hi. Hih pen sil lamdang hilou hi. Leitung mun tuamtuam ah zong Christian ngiamkiatna liantak ana tung hi. Gam tamtaka tangthupha ana thehzak England gam ah tu in mi 100 laka 7-te chauh biakin kai uhi. Leitunga missionary tam sawlkhe pen America ah zong naunoh, neih kibang kiteng, khamtheih zongsang chihte pumdim hi. Nupa za lakah 50% kikhen zel uhi.  Ahi’n aleh lam i etkikleh amau gam siatna san kawmkawm in gam tamtaka  tangthupha ana thehzak khit un tu in zong missionary nasepna ah hahtakin pan ala tou zel uhi. Missionary langtang taka sawl di kiphallouhna gam tuamtuam adiakin China ah tumlam a nasem leh sumkawlvei a omkhate’n nasep kawmin Pasian thugen toh thuah ua lohching mahmah uhi.
             

                  Tuipi gal pana i gam a tangthupha hung tunna kum 100 a chin toh kiton in e’n zong kuate nam, kua nu/pa khat hiam kianga i tut sawn di pen ei mohpuakna ahita hi. Missionary in i kuan ei, amau sawltu in i pang ei chih pen ei deihtelna leh Pasian sapna i tan dungzui ahi ding hi. Tuabanah  khoimun peuh a i om in zong i omna mun chiat a Pasian  theihpihtu leh Gospel meivak tansak ding i mohpuak ahi. I “zilna/sepna mun” i “mission field” dana i lak theih chiangin Christian  thugin diktak zui ki hi sem lai ding hi. I gammial salhvaktu Gospel vak i gamsung ah mitlouin taang tawntung ta hen!

Share: