KUA NA KHAWLPIH A?

- Lamboi Suantak, South Delhi

       Mihingte hinkhua ah apoimoh mahmah khat ahihleh khawlpih lawm leh gual ahi hi. Ei mihingte bek hilou in gamsate leh tungleng vasate leh ganhing dangdangte in zong khawlpih, pawlpih, lawm leh gual poimoh uhi. Tuamah bangin khoimun khoigam ah om in tengta le hang zong khawlpih lawm leh gual ding kisam in i poimoh den hi. I khawlpih lawm leh gualte amun tuam dungzui in kilamdang thei a, omna tenna, ham leh pautuam dungzui in mizia tuam, chindan tuam lunggel leh gamtat khohei tuam chiat kinei hi.Tua bangmah in mi tuamtuam toh kipawl chiang in gualten  zong ei omdan, hamdan, khohei dante na laa in na chiingthei ua, theihlouhkal mah in enzong i lawmte omdan, nekdan dondan,leh gamtatziate mah la in i niteng hinkhuate ah i zang denthei hi. Eima pianken mizia taktak mansuah in i khawlpih lawm leh gualte omdan la (copy) in hindan  kikhek lamdang thei hi.

BANG CHI BANG MI E NA LAWM?

       Na iit mahmah leh na ngaihnat mahmah na lawm bang chi bang mi e chih dokna om leh bangchin na dawng diai? A hihke’h na lawm omdan leh tanchin thei loupi a kipawlpih na hikha diam? Na lawm in nang bang chi’n a hung thei a? Nang’ na lawm bang chibang mi hi in na thei a? chih theihchian mahmah ding in hoih hi. Hih bangte theichian loupi alawm leh gual i pawl chiang in theihlouh kal in siatna khukpi kitung thei a, siamphat kik theih nawnlouh omdan leh chindan hoihlou kinei den thei hi. I gamsung ah khanglai tampite manthatna leh siatna zong lawm hoih aneih khak louh man uh hi ding in gingta ing. Na kikhawlpih mun penpen  na lawm sunkha di na hihmanin pilvang in. Amah sunta lechin na lungkim diam?

LAWM HOIHPEN:

        I hinkhua ah niteng in lawm tampi pawl in i nei zel a, ahihhang in i lawmpawl tengteng lak ah eimi nunzia hung theisiam, hung khuatuah leh hung it, i nopna i dahna ut bangbang i gentheih na leh i haksatna hung theihpih/thuakpihte pen i lawm hoih pen (best Friend) i chi hi. I lawm pawl tengteng tuabang mi mawk tamlou in atamzawte i haksat, i buai, i gentheih hun a hung taisan thei lawm tam mahmah hi. Tuabang in hih leitung lawmte’n zong  hung taisan in hung nusia thei ua, mun tuam gam tuam ah hung paisan heisan thei uhi. Tua bek hilou in sihna leh natna tenzong hung khen thei a, ei deih hun leh ngaih hun in i kiang ah om tawntung theilou uhi. Ahihhang in ni teng, hun teng leh dak teng in ei toh hung omkhawm thei gige, i haksat, i gentheih, i zawn i hauhdan hung thei siam, i natna, i haksatna, i lungkhamna leh i puakgik  teng hung thuakpih nuam, lawm hoihpen “khasiangthou leh i Toupa Jesu khrist” i nei hi. Amah bang lawmhoih omlou hi.

         Bible sungah Pasian toh khawlkhawm mite tanchin tamlou enlai ni:

-Enok toh Pasian  na kikhawl ua, sihna chiamlou in Pasian in amah la tou hi.( Genesis 5:22-24).

-Noah toh Pasian na kikhawl ua, Pasian in tuizin sihna pan in hunkhia hi( Genesis 6:9).

-Mosi leh Pasian ‘Sinai Mual’ ah sun sawmli leh zan sawmli akihou akikhawl ua Mosi maitang taang(shining) in, Pasian mel sun ahih man in amite’n Mosi mai en theilou uhi (exodus 34:29, 24:18 and deutronomy 9:9).

-Peter leh Jesu khawlkhawm  gige uh ahihlam miten’ amit hahdan, ahamdan leh a omdan apat in theithei uhi.(Matthai26:69 – 73, Luke 22:56)

I Toupa Jesu zong hih leitung alensung in   Pasian toh na kihou in na kikhawl den hi. (Mathai 6 : 46, 14 : 23, john 18 : 1to 2 leh luke 22 : 39).

THUKHITNA:

           Atung a i gen Pasian mi masate’n Pasian toh khawlkhawm ding lunggulh in khawlkhawm den uh a, sutdan tuam chiat in Pasian hihna sun uhi. Amau-le-amau’ akitheih louh hang un mite’n Pasian mizia, meel leh puam omdan kilatdan aneih lam uh muthei in sim thei uhi. I Krishtian hinkhua ah tunitan mite’n i omdan, i gamtatdan, i hamdan leh i mi nunzia apat in Pasian toh kikhawl ngaimi i hihlam a theithei ding uai…? Ahihke’h i zuih Khrist sang in sut zawk dang i nei de aw chih lunghihmoh huai kasa mahmah hi. Tulai ei Khristian tamzawte in Pasian toh khawlkhawm a thunget ding kingaihsak nawnlou hi. Bible sung a i Toupa Jesu Khrist ngeingei nangawn in zong Pasian toh khawlkhawm na ding hunbi tuam bawl tinten in na zang hi.

          Amah  i Toupa Jesu Khrist Pasian pianzia bukimtak a neipa nangawn in Pasian toh khawlkhawm thupi ngaihsun in a lunggulh thei lailai leh ei leitung mihingte din bangzah in apoimoh diam? Leitung a thugen minthang leh Pasian mizak minthangte’n zong Pasian toh khawlkhawmna in hun tamzaw zang tawntung uhi. Nang leh ke’n i khalam hinkhua i Khristian hinkhua apichin, i gahsuah theihna ding in ni khat in dakkal, minute bangzah Pasian toh khawlkhawmna (thumna) hun in na zang zel a? Thumna hi gingtute ading in khalam ann poimoh pen leh Pasian toh houlim in i kikhawlpih theihna omsun ahihman in sanggam aw  tuni akipan in athak in Pasian toh khawlkhawm ding hanchiam thak ni.Toupan amah toh kipawlna lunggulh semsem ding leh ama nunzia bukim nei thei semsem ding in simtute tengteng thupha hung pe kimchiat ta hen!

Share: