Copenhagen Climate Change Summit - Nung Leh Ma

                                                                                                         - Mangneu Thangkhal, JNU

      Mihing khantouhna in chiangtan neilou in ma asawn zel hi. Hichibang khantouhna tamzawte i tenna leitung adi’n ana hoih kei hi. Gari, vanleng, mobile, fridge, a/c, engine leh khawl tuamtuamte’n huihkhua sunin in leitung kho omdan kikhekna(climate change) omsak hi. Leitung kho omdan suisiam geologist-te’n amuhdan un, kum 100 paisa vukkhal tuimang(melt) ziak leh tuipi sat ziakin tuipi piau 15cm(6inches) in khangtou hi. Mualdawna vukkhallte a tuimang a Greenland leh Arctic kimlak leitang akiam sema, tuipi sat ziakin tuinuaia ganhing leh loupa tampi si hi. Guah hahzuk ziakin mun tamtak a tuilet, guah zuklouh ziakin kialtung a, khosat seng ziakin mi si. Kho omdan kikhek ziakin gamsate kituan lehleh ua huih leh piingpei hat ziakin mihing tamtak ana sita hi. Maban ah zong kho omdan kikhek ziakin mun tamtakah haksatna tun di hi. 

          Climate Change(Global Warming) doudalna dinga panlakna ziakin Intergovernmental Panel on Climate Change(IPCC) leh US Vice-President lui Al Gore Nobel Peace Prize 2007 piakin ana om uhi. IPCC gendan in Himalaya mualdawna Tibet Mualzaang avuk khal teng kum 2035 chiangin tuimang(melt) dinga tua in Indus, Satluj, Brahmaputra, Mekong, Yangte luite khangsak in mun tamtak ah tuilet ding  chi uhi. Hih thu toh kisai ah uang gen seng uh chih ziakin thubuai ana nei kha mahleh uh vukkhal tuimang tou zel ahi chih achiang hi. Tuisuahgiat(ocean) khang dinga Indian leh Pacific  Ocean a tuikolhgam(island) tamtak tummang ding hi. 

            Hihte ziakin United Nations in Climate Change doudal ding angaikhawk mahmah a khawmpi tamveipi ana samkhawmta hi. Kum 1997 in Japan khopi Kyoto ah Kyoto Protocol kilemtuahna ana pankhia ua 1998 in United Nations Framework Convention on Climate Chang(UNFCCC) gamte’n suai akaih ding un honkhiat ahi. Kum 2005 a zak pat in om hi. November 2009 tanin gam 187 pompih hi. Hih kilemtuahman dungzuiin gam changkang 37-te’n huihnin(carbon dioxide, methane, nitrous oxide, sulphur hexafluoride, hydrofluorocarbons leh perfluorocarbons) akhahkhiat uh 1990 level a 5.2% asukkiamna ding uh, kum 2012 tana a akichiamna uh a sukpichin ding uh chih ahi. Huihnin hah khahkhiat pen US in suai akaih hanga a pomkip(ratify) utlouh ziakin nawngkai mahmah hi.

            United Nations Climate Change Conference Indonesia khopi Bali ah December, 2007 neih in aom hi. Hih khawmpi ah Climate Change doudalna ding Bali Road Map kichi ana bawlkhia uhi. Hih khawmpi a hoh Conference of Parties(CoP) gamte’n kum 2009 tana gen fel ding Bali Action Plan kichi ana namdet uhi. Kum 2012 nung chianga Climate Change doudalna ding sepkhiat ahih theihna dinga panlak din kithukim uhi. A nunung penin December 7-18 sung United Nations Climate Change Conference 2009 (atom a Copenhagen Summit kichi) Denmark khopi a neih in om hi. Hih khawmpi ah 15th Conference of the Parties (COP 15) to the United Nations Framework Convention on Climate Change leh 5th Meeting of the Parties (COP/MOP 5) to the Kyoto Protocol apan leh UN member gam 192 apan palai tamtakte apang uhi. Bali Road Map 2007 kilemtuahna dungzuiin hih khawmpi ah 2012 nunga climate change dalna dia kithukimna dettak bawl di chih ahi.

            Sunsawt-zansawt nunga sawtpi kiseltuah nungin December 18 in US leh BASIC (Brazil,  South Africa, India leh China) gamte’n Copenhagen Accord kichi kilemtuahna khat ahung bawlkhe thei hamham uhi. Hih accord pen dan piching taktak(legal binding) hi nailou a khawmpi palai teng in zong thukimpih lou uhi. A kithukimtuahna ua gen theih omsun ahihleh leitung khosatdan khangzel doudalna dinga temperature 2 degree celcius sukkiamna dinga panlak ding chih ahi lel hi. US in gam khangtoulaite kianga huihni’n sukkiamna dinga kum 3 sunga US Dollar 30 billion apiak ding, 2020 tana 100 billion tana khansak ding in lemsak hi. Gam zawngte’n gammang a kepbitna ding ua gam hausate’n a panpih ding un zong kilemtuah uhi. Temperature khang 1.5 degrees ngiamsakna dinga 2050 tana huihni’n 80% sukkiam ding chih pen US in pomlou hi. Gam khat in CO2 gas a sukkiam di zah bikhiah hilou hi. Copenhagen Accord dungzuia gam tuamtuam in huihnin a sukkiam di zah uh January 31, 2010 a apuankhiat di uh chih himahleh gam tamtak in puangkhe  utlou uhi.

            Akibuaina pipen ahihleh gam khangtou leh khangtouloute kikala huihnin(greenhouse gas) sukkiamna dia kithukimna om theihlou ziak ahi. Gam khangtoute’n huihnin a khahkhiat zah uh gam khangtouloute a toh teh in a sang mahmah hi. Gas sukkiam ding chih pen factory tamtak sukha ding ahihmanin silbaih liai hilou ahi. Company-te leh government summuhna kiam ding chihna ahi.  Centre for Public Policy, Washington report danin US ah company 770 in  US government official mi 2340 ana guai uhi. Theih di khat ahihleh khaini, za, zu chihvel zong government adia sum(tax) muhna hoihtak ahihziaka government in apawng khamlouh ahi. Ei lama Hausa khenkhat in sum muhna dia ‘kani’ lei bawl aphal te uh toh teh theih va liai hilou ahi.

            Copenhagen Summit om masangin BASIC gam 4te atuam in ana kihoukhawm masa ua gam khangtoulaite(developing countries) adinga ahoihlou a kigen leh doudal khawm ding chi’n ana kithukim uhi. Atawp ni zana Pu Obama in Chinese PM Wen Jiabao amahtanga kimuhpih di achihleh Pu Jiabao utlouin BASIC gam lamkai teng toh kihoukhawm uhi. US banah  gam tamtakte’n huihnin akhahkhiat zah uh sukiam utlouh ziak un maban a Climate Change doudalna panlak didan haksa hi. Panlak khawm poimoh; kithukimna lah om theilou chih ahi abuaina...

Share: